राष्ट्रिय अर्थतन्त्र बलियो बनाउन सहकारीको भूमिका बढाउन जोड

  • जेष्ठ २९, २०७५

सवल र सफल मुलुक निर्माणका लागि सहकारी अभियानको भूमिकालाई बढाउनु पर्नेमा सरोकारवालाहरुले जोड दिएका छन् ।

दीगो आर्थिक विकासका लागि स्थानीय स्रोतको अधिकतम परिचालन गरी सवल र सफल मुलुक निर्माणका लागि सहकारी अभियानको भूमिकालाई बढाउनु पर्नेमा तनहुँको दमौलीमा आयोजित एक कार्यक्रमका सहभागीहरुले जोड दिएका हुन् । राष्ट्रिय सहकारी बैंक लिमिटेड दमौली शाखाले सोमबार आयोजना गरेको अन्तरक्रिया तथा पुरस्कार वितरण कार्यक्रमका सहभागीहरुले स्थानीय स्रोतको परिचालनका लागि सहकारी क्षेत्रलाई प्राथमिकताका साथ अगाडि बढाउन आवश्यक रहेको औँल्याए । कार्यक्रममा प्रमुख अतिथि जिल्ला समन्वय समिति तनहुँका संयोजक शालिकराम वाग्लेले समृद्ध नेपाल र सुखी नेपालीको अभियानलाई सफल पार्नका लागि सहकारी क्षेत्रको सवलीकरण आवश्यक रहेको बताउनुभयो । उहाँले देशमा खेर गैरहेका स्रोत र साधनको उपयोग गरी जनतालाई आयआर्जनका साथै व्यवसायिक बनाउन सहकारी क्षेत्र उपयुक्त र प्रभावकारी हुने धारणा राख्नु भयो ।

यस्तै ब्यास नगरपालिकाका प्रमुख वैकुण्ठ न्यौपानेले विपन्न वर्गका जनतालाई आर्थिक रुपमा सबल बनाउनका लागि गरिवी निवारण र विपन्न वर्ग लक्षित कार्यक्रमहरु सहकारी बैंकमार्फत जनतामा लैजानु पर्नेमा जोड दिनुभयो । कार्यक्रममा नेपाल कम्युनिष्ट पार्टी (ने क पा) का केन्द्रीय सदस्य पि.एल. श्रेष्ठ, दुग्ध उत्पादक केन्द्रीय सहकारी संघका वरिष्ठ उपाध्यक्ष अमरबहादुर कुँवर, जिल्ला सहकारी संघ तनहुका अध्यक्ष श्रीप्रसाद भट्टराई, समाजसेवी समुन्द्र गोदार, जिल्ला कृषि सहकारी संघका अध्यक्ष रामजी लौडारी, जिल्ला वचत तथा ऋण सहकारी संघका महासचिव प्रदिप अधिकारी, जिल्ला दुग्ध उत्पादक सहकारी संघका अध्यक्ष यज्ञप्रसाद पौडेल, तनहु उद्योग वाणिज्य संघका अध्यक्ष मानकाजी श्रेष्ठ लगायतले राज्यले गरिवी निवारणका लागि परिचालन गर्ने बजेट सहकारी बैंकमार्फत लैजान सकेमा लक्षित वर्ग बढी लाभान्वित हुने र त्यसको प्रतिफल आउने धारणा राख्नु भएको थियो ।

बैंकका प्रवन्ध सञ्चालक के.बी.उप्रेतीको अध्यक्षतामा सम्पन्न कार्यक्रममा अन्तरक्रिया कार्यक्रमको औचित्य, बैंकका आगामी कार्यक्रम र अभियानसंगको समन्वयका बारेमा बैंकका सञ्चालक रामबहादुर जिसीले जानकारी गराउनु भएको थियो । कार्यक्रममा बैंकको संक्षिप्त चिनारीका बारेमा व्यवसाय प्रवद्र्धन विभागका प्रमुख मधु रायमाझीले प्रस्तुतीकरण गर्नु भएको थियो । कार्यक्रमको सञ्चालन बैंकका पोखराख शाखाका प्रमुख केदार उप्रेती र स्वागत दमौली शाखाका प्रमुख सुमित्रा थापाले गर्नु भएको थियो ।

सोही अवसरमा राष्ट्रिय सहकारी बैंकको दमौली शाखामा आ.व. २०७३/०७४ मा उत्कृृष्ट कारोबार गर्ने सहकारी संस्थाहरु शुभलक्ष्मी बचत तथा ऋण सहकारी संस्था लिमिटेड र कामना बचत तथा ऋण सहकारी संस्था लिमिटेडलाई सम्मान गरिएको थियो । २०६७ साउनमा स्थापना भएको सहकारी बैंकको दमौली शाखामा तनहुँ, गोर्खा, लम्जुङ र मनाङका गरी ३ सय सहकारी संघ संस्था सदस्य, १९ करोड निक्षेप र १८ करोड लगानी रहेको शाखा सहायक पार्वती श्रेष्ठले जानकारी दिनुभयो ।

 

सम्बन्धित शीर्षकहरु

टिप्पणीहरू