सरकार जनताको जीवनमा परिवर्तन ल्याउने कार्यमा योजनावद्ध छ : मन्त्री अर्याल

  • बैशाख ९, २०७६

भुमी व्यवस्था, सहकारी तथा गरिवी निवारण मन्त्री पद्माकुमारी अर्यालले सरकार जनताको जीवनमा परिवर्तन ल्याउने अभियानमा रहेको बताउनु भएको छ ।

स्याङ्जाको वालिङ २ स्थित छप्राकमा दलित महिलाहरुद्वारा स्थापना गरेको सिद्धबाबा श्रमिक महिला सहकारी संस्था लिमिटेडको उद्घाटन गर्दै मन्त्री अर्यालले यस्तो बताउनु भएको हो । सरकार जनताको जीवनमा परिवर्तन ल्याउने कार्यमा योजनावद्ध ढगंले लागेको भन्दै उहाँले सरकारका कामले पुर्णता पाउन समय लागे पनि जनताले अनुभुत गर्ने गरी सरकारले जनताको जीवनस्तरमा देखिने गरी परिवर्तन ल्याउने दाबी गर्नुभयो ।

यसैगरी काम गर्दा पारदर्शी किसिमले गर्नुपर्ने मन्त्री अर्यालले बताउनुभयो । उहाँले सरकारले पठाएको बजेट तोकिएकै ठाउँमा प्रयोग गर्न समेत निर्देशन दिनुभयो । “सरकारले जुन ठाउँको लागि बजेट पठाएको छ स्थानीय तहले सोही ठाउँमा प्रयोग गर्नुस् । त्यस्तो नगरेर अन्यत्र प्रयोग गरेमा सरकारले हस्तक्षेप समेत गर्ने अवस्था आउन सक्छ । त्यसकारण तपाईहरु सचेत रहनुहोस”, मन्त्री अर्यालले भन्नुभयो ।

मन्त्री अर्यालले श्रमिकलाई हेलोहोचो गरेर देशको विकास नहुने भन्दै सरकारले श्रमिकहरुलाई सम्मान गर्ने मन्त्री अर्यालले बताउनुभयो । काम गरेर कोही सानो नहुने भन्दै उहाँले श्रमिकहरुलाई कामको उचित मुल्य दिनुपर्ने समेत बताउनुभयो । गरिब हुनु मानिसको कमजोरी नभएको बताउदै उहाँले जन्मदै कोही धनी भएर आउदैन धनी हुने एउटै मात्र उपाय परिश्रम भएको बताउनुभयो ।

परिश्रम गर्न पछि पर्न नहुने उहाँले सुझाव दिनुभयो । मन्त्री अर्यालले घरबार बिहिन जनताका लागि सरकारले जनता आवास कार्यक्रम सञ्चालन गरेको बताउदै असुरक्षित घर खरका छाना भएकाहरुलाई विस्थापित गरेर सुरक्षित बस्ती बनाउने अभियान अन्तर्गत जस्तापाताले घर छाउनको लागि प्रति घर ५० हजारका दरले उपलब्ध गराउने पनि बताउनुभयो ।

चापाकोट नगरपालिकामा विपन्नका लागि आएको जनता आवास अन्तर्गको कार्यक्रममा सम्पन्नशालिले सुविधा लिएको र त्यो सरकारले फिर्ता गराएको स्मरण गराउदै उहाँले अशक्तका नाममा आएको सेवा सुविधा अरुले प्रयोग गरे त्यस्तो कार्य सरकारलाई सह्य नहुने बताउनुभयो । यसैगरी मन्त्री अर्यालले भीरकोट नगरपालिका स्थित नयाँ कृषि अभियान कृषि सहकारीको प्रथम साधारणसभाको उद्घान गदै सरकार कृषि सहकारीका माध्यमबाट गाउँगाउँमा रोजगारी सिर्जना गर्ने योजनामा रहेको बताउनुभयो ।

यसैबीच मन्त्री अर्यालले वालिङ २ स्थित छप्राकमा रहेको दलित बस्तीमा झुल वितरण गर्नु भएको छ । मन्त्री अर्यालले स्वास्थ्य मानिसले मात्रै राम्रोसँग काम गर्न सक्ने बताउदै मच्छडको टोकाइबाट लाग्न सक्ने रोगबाट बच्नको लागि आफुले दलित बस्तीमा झुल वितरण गरेको बताउनुभयो ।

सरकारले दलितका समस्या समाधान गर्ने बताउदै उहाँले घरबास नभएकाहरुका लागि जनता आवास कार्यक्रम मार्फत घर उपलब्ध गराउने र जोखिम पुर्ण खरका छाना भएका घरहरु लाई जसता पाताले छाउनका लागि प्रतिघ ५० हजारका दरले रकम उपलब्ध गराउने पनि बताउनुभयो । खानेपानीको सहज व्यवस्था नभएसम्म सरसफाई कार्य पुर्ण नहुने भन्दै सरकारले सबै जनताको घरघरमा खानेपानीको सुविधा पुर्याउने मन्त्री अर्यालको भनाइ थियो ।

दलित बस्तीमा आएर झुल बितरण गर्नुका साथै आफूहरुका कुरा गुनासो मन्त्रीलाई नै सुनाउन पाएपछि खुसी लागेको जमान सिंग नेपालीले बताउनुभयो । दुई सय पाँच घर रहेको दलित बस्ती छप्राकमा प्रत्येक घरको लागि एक एक वटा र ७० वर्ष भन्दा माथीका वृद्धाहरुलाई पनि मन्त्री अर्यालले झुल हस्तान्तरण गर्दै झुल लगाएर मात्र सुत्न आग्रह गर्नु भएको थियो ।

 

 

 

सम्बन्धित शीर्षकहरु

टिप्पणीहरू