कर्जा नतिर्ने डेढ सय सहकारीको सम्पत्ति रोक्का गरिने

  • जेष्ठ ३, २०७६

युवा तथा साना व्यवसायी स्वरोजगार कोषले कर्जा नतिर्ने डेढ सय सहकारीको अचल सम्पत्ति रोक्का गर्न सुरु गरेको छ ।

युवालाई स्वरोजगार बनाउने नाममा कोषबाट सहुलियत ब्याजदरमा लिएको कर्जा निर्धा्रित समयमा नतिरेपछि कोषले मुलुकभरका एक सय ४८ सहकारीको सम्पत्ति रोक्का गर्न पत्राचार गरेको हो । तीमध्ये ८४ वटा सहकारीको घरजग्गा रोक्का भइसकेको छ । बाँकीको रोक्का हुने क्रममा छ । कोषका अनुसार यी सहकारीले करिब १९ करोड ४३ लाख रुपैयाँ तिर्न बाँकी छ ।

कोषले सहकारी, सञ्चालक, व्यक्तिको घरजग्गासहित अन्य सेवा सुविधासमेत रोक्का गरेको छ । कोषका कार्यकारी निर्देशक विष्णुप्रसाद गौतमले सम्झौताअनुसार कर्जा नतिरेपछि कारबाही अघि बढाएको जानकारी दिनुभयो । “बैंकबाट विपन्न क्षेत्रको कर्जा ल्याएर लगानी गरेका हौं,’ गौतमले भन्नुभयो, ‘पटक–पटक ताकेता गर्दा पनि अटेर गरेपछि सम्पत्ति र सेवा–सुविधा रोक्का गर्यौँ ।” कोषले तीन पुस्तेसहित सम्पत्ति रोक्का गर्न सम्बन्धित जिल्लाका मालपोत कार्यालयमा पत्राचार गरेको थियो । केही सहकारीको स्थानीय तहले दिने सेवा–सुविधासमेत रोक्का गर्न पत्राचार गरेको छ ।

कोषले सरकारी सेवा–सुविधाबाट वञ्चित गर्दै धाराको पानी, बिजुली र सहकारी सञ्चालकको राहदानीसमेत रोक्का गर्न निर्देशन दिएको छ । कोषका असुली शाखा प्रमुख लोकबहादुर खड्काका अनुसार ती सहकारीमा आवद्ध दुई हजार ५८ जना व्यक्तिको सम्पत्ति रोक्का गर्न पत्राचार गरिएको छ । “चार सय १७ जनाको सम्पत्ति रोक्का भइसकेको छ”, खड्काले भन्नुभयो, “१५ सय १३ जनाको अन्य सेवा–सुविधा पनि रोक्का गर्न पत्राचार गरेका छौं ।”

सम्पत्ति रोक्का गरे पनि लिलामी गर्न कानुनी जटिलता रहेको खड्काले बताउनुभयो । “ऐन–कानुन अभावमा रोक्का गरेको जमिन बेचेर रकम असुल्न सक्ने अवस्था छैन”, उहाँले भन्नुभयो ।
नागरिक

 

सम्बन्धित शीर्षकहरु

टिप्पणीहरू